O‘zbekiston Respublikasi oliy harbiy aviatsiya bilim yurti

O‘zbekiston Respublikasi Oliy harbiy aviatsiya bilim yurti O‘zbekiston Respublikasi Mudofaa vazirligi qo‘shinlari tarkibidagi oliy harbiy taʼlim muassasasi bo‘lib, Havo hujumidan mudofaa qo‘shinlari va harbiy havo kuchlarining uchuvchi va muhandis-texnik tarkibi uchun ofitser kadrlarni tayyorlashga ixtisoslashtirilgan.

Bilim yurti hozirgi kunda quyidagi yo‘nalishlarda mutaxassis tayyorlab bermoqda:

1. Harbiy havo kuchlari taktik – qo‘mondonlik (qiruvchi aviatsiyasi, uchuvchi-muhandis, harbiy transport aviatsiyasi, uchuvchi-muhandis, vertolyot aviatsiyasi uchuvchi-muhandis).

1. Harbiy havo kuchlari taktik qo‘mondonligi – havo harakatini boshqarish (havo harakatini boshqarish dispetcheri – muhandis).

2. Uchish apparatlari va dvigatellariga xizmat ko‘rsatish bo‘yicha aviatsiya muhandisi (Muhandis-texnik).

3. Uchish apparatlarining aviatsiya qurollariga xizmat ko‘rsatish bo‘yicha aviatsiya muhandisi (Muhandis-elektrotexnik).

4. Uchish apparatlarining aviatsiya jihozlariga xizmat ko‘rsatish bo‘yicha aviatsiya muhandisi (Muhandis-elektrik).

5. Uchish apparatlarining radioelektron jihozlariga xizmat ko‘rsatish bo‘yicha aviatsiya muhandisi (Radio-muhandis).

Bilim yurtida taʼlim olish shakli – kunduzgi, o‘qish davomiyligi 5 yil bo‘lib, o‘qish o‘zbek, rus va ingliz tillarida olib boriladi.Bilim yurti Havo hujumidan mudofaa qo‘shinlari va harbiy havo kuchlariga aviatsiya mutaxassislarini 5 yillik o‘qish davomida oliy taʼlimning bakalavr yo‘nalishidagi o‘quv dasturlariga muvofiq o‘quv jarayonini amalga oshiradi.

Bilim yurtining asosiy maqsadi – belgilangan muddat davomida, o‘z Vataniga sodiq, intellektual rivojlangan, tahliliy va tanqidiy fikrlaydigan yuqori malaka, murakkab vaziyatlarda tezda baholash qobiliyati ega, jangovar-xizmat, taktik va tezkor vaziyatlarda mohirlik bilan tegishli qarorlarni mustaqil qabul qilishga qodir, dunyoqarashi keng, yuksak ruhiy va maʼnaviy-axloqiy fazilatlarga ega bo‘lgan ofitser kadrlarni tayyorlashdir.

Bilim yurtining asosiy vazifalari quyidagilardan iborat:

• oliy maʼlumotli harbiy aviatsiya mutaxassisligidagi ofitserlarni, harbiy, ilmiy va ilmiy-pedagog kadrlarni tayyorlash;
• ofitser kadrlarni kasbiy qayta tayyorlash va malakasini oshirish;
• mamlakat mudofaasi va xavfsizligini mustahkamlash va harbiy xizmatchilarning kasbiy tayyorgarligini oshirish muammolarini hal etishga qaratilgan fundamental va amaliy harbiy ilmiy tadqiqotlarni tashkil etish va o‘tkazish;
• oliy va oliy o‘quv yurtidan keyingi professional taʼlim olish orqali harbiy kadrlarning intellektual, madaniy va maʼnaviy rivojlanish ehtiyojlarini qondirish;
• harbiy tayyorgarlik sohasidagi ilmiy, uslubiy va taʼlim salohiyatini har tomonlama rivojlantirish, yetakchi va xorijiy oliy o‘quv yurtlari bilan hamkorlikni kengaytirish;
• o‘quv-tarbiyaviy jarayonga taʼlimning interaktiv metodlarini, yangi axborot-kommunikatsiya va pedagogik texnologiyalarini hamda mustaqil taʼlim tizimini joriy qilish;
• harbiy xizmatchilarni intellektual, madaniy va o‘qitish sohasida yuqori uslubiy va taʼlim salohiyatini rivojlantirish, yetakchi milliy va xorijiy oliy o‘quv yurtlari bilan hamkorlik qilish;
• harbiy taʼlim va ofitser kadrlar tayyorlash sifati monitoringini joriy etish;
• harbiy taʼlim va ofitser kadrlar tayyorlash sifatini nazorat qilish;
• yoshlarning harbiy kasbiy yo‘naltirilganligini va uni oliy harbiy o‘quv yurtlariga kirishga tayyorlash bo‘yicha ishlarni tashkil etish.

Bilim yurti bitiruvchilari O‘zbekiston Respublikasi Mudofaa vazirligi qo‘shinlari tarkibidagi, Havo hujumidan mudofaa qo‘shinlari va harbiy havo kuchlarining harbiy qismlarida shartnoma asosida xizmatni olib borishadi.