“Akademik mobillik qo‘shma ta’lim dasturlari, investitsiyalar” – O‘zbekiston va Fransiya universitetlari o‘rtasida 26 ta hujjat imzolandi

O‘zbekiston Respublikasi Prezidenti Shavkat Mirziyoyevning Fransiyaga rasmiy tashrifi doirasida 10-mart kuni Parij shahrida “Ilm-fan va ta’lim: O‘zbekiston – Fransiya ko‘prigi” mavzusida qo‘shma konferensiya bo‘lib o‘tdi. Bu haqda O‘zbekiston Respublikasi Oliy ta’lim, fan va innovatsiyalar vazirligi ma’lum qildi.

Vazirlikning ma’lum qilishicha, konferensiya doirasida ikki mamlakat oliy ta’lim muassasalari va ilmiy markazlari o‘rtasida jami 26 ta shartnoma, bitim va xalqaro loyihalar bo‘yicha kelishuvlar imzolangan.

Ushbu hujjatlar qo‘shma ta’lim dasturlarini yo‘lga qo‘yish, professor-o‘qituvchilar malakasini oshirish, talabalar almashinuvini tashkil etish hamda ilmiy tadqiqotlar sohasida hamkorlikni kengaytirishga qaratilgan.

Akademik mobillik va qo‘shma dasturlar

Konferensiya davomida quyidagi universitetlar o‘rtasida akademik mobillik to‘g‘risidagi Bitimlar imzolandi:

• – Andijon davlat chet tillari instituti – Puate universiteti, Frankofoniya universiteti;
• – O‘zbekiston davlat jahon tillari universiteti – Parij XIII Shimoliy Sorbonna Universiteti, Puate universiteti;
• – Farg‘ona davlat universiteti – Sorbonne Universiteti;
• – Samarqand davlat chet tillar instituti – Monpiler 3 universiteti;
• – Toshkent to‘qimachilik va yengil sanoat instituti – Lion La Martiner-Didro litseyi, Lion to‘qimachilik va kimyo instituti (ITECH);
• – O‘zbekiston Milliy universiteti – Parij XIII Shimoliy Sorbonna Universiteti, ASIE xalqaro birdamlik va ta’lim assotsiatsiyasi.

Shuningdek, Namangan davlat chet tillari instituti Frankofoniya universitetlar assotsiatsiyasi va VATEL Hospitality Management School oliygohi bilan akademik va ilmiy hamkorlik bo‘yicha bitimlarga erishdi.

Muhandislik, transport va axborot texnologiyalari sohasida hamkorlik

Muhandislik va texnologik rivojlanish bo‘yicha qator muhim hujjatlar imzolandi. Toshkent davlat transport universiteti Puate universiteti, Lion 2 universiteti, Le Gavr Normandiya universiteti va Renn universiteti bilan “UNIFROUZ / O‘zbekiston-Fransiya universiteti” konsorsium loyihasi doirasida kelishuvga erishdi.

Shuningdek, Toshkent davlat transport universiteti Airbus kompaniyasi bilan talabalar va professor-o‘qituvchilar uchun stajirovka va malaka oshirish dasturlarini yo‘lga qo‘yish bo‘yicha shartnoma imzoladi. Aviatsiya yo‘nalishida universitet va Fransiyaning Fuqarolik Aviatsiyasi Milliy Maktabi (ENAC) o‘rtasida hamkorlik kelishuvi tasdiqlandi.

Buxoro davlat universiteti va Fransiya raqamli universiteti (FUN – France Université Numérique) o‘rtasida raqamli ta’lim platformasidan foydalanish bo‘yicha bitim imzolandi.

Bundan tashqari, Toshkent axborot texnologiyalari universiteti ENSSAT muhandislik instituti bilan 2025–2026-yillar uchun “Yo‘l xarita”ni ishlab chiqish bo‘yicha kelishuvga erishdi. Universitet shuningdek, Parij-Saklay universiteti bilan hamkorlik aloqalarini o‘rnatish bo‘yicha shartnoma imzoladi.

Innovatsion loyihalar va investitsiyalar

Konferensiya doirasida “TIQXMMI” Milliy tadqiqot universiteti va Fransiyaning “SUEZ International” kompaniyasi o‘rtasida hamkorlik kelishuvi imzolandi. Toshkent davlat texnika universiteti esa UzAssystem kompaniyasi bilan dasturiy ta’minot bo‘yicha shartnoma tuzdi.

Toshkent davlat transport universiteti va Ko‘priklar va yo‘llar oliy maktabi o‘rtasida “Tezyurar transport uchun ko‘priklar va yo‘llar” yo‘nalishida PISH (professional ilmiy-tadqiqot hamkorligi)ni tashkil etish bo‘yicha kelishuvga erishildi.

“Imzolangan hujjatlar qo‘shma ta’lim dasturlari, professor-o‘qituvchilar malakasini oshirish, talabalar almashinuvi va ilmiy hamkorlikni yanada rivojlantirishga qaratilgan”, – deyiladi vazirlik axborotida.