Andijon mashinasozlik instituti

Oliy taʼlim muassasalarining moddiy-texnika bazasini mustahkamlash va modernizatsiyalash, ularni zamonaviy o‘quv va ilmiy-laboratoriya jihozlari bilan taʼminlash, yuqori malakali kadrlar tayyorlash yo‘nalishlari va mutaxassisliklarini maqbullashtirish, taʼlim standartlarini takomillashtirish hisobiga taʼlim jarayonini sifat jihatdan yangi bosqichga ko‘tarish, ilg‘or pedagogik texnologiyalar va o‘qitish shakllarini joriy etish, o‘qituvchi kadrlar mehnatini rag‘batlantirishni kuchaytirish asosida iqtisodiyot soha va tarmoqlarida talab qilingan oliy maʼlumotga ega mutaxassislarni tayyorlash sifatini tubdan yaxshilash maqsadida:

O‘zbekiston Respublikasi Oliy va o‘rta maxsus taʼlim vazirligining manfaatdor vazirliklari, idoralari va xo‘jalik birlashmalari bilan kelishilgan ixtisoslashuvini o‘zgartirish va qayta tashkil etish to‘g‘risidagi taklifga binoan, O‘zbekiston Respublikasi Prezidentining PQ‑1533 sonli va O‘zbekiston Respublikasi Vazirlar mahkamasining Andijon muhandislik-iqtisodiyot institutini Andijon mashinasozlik institutiga aylantirish to‘g‘risidagi 2011 yil 25 iyuldagi 214 sonli qarori, O‘zbekiston Respublikasi Oliy va o‘rta maxsus taʼlim vazirligining 2011 yil 29 iyuldagi 319 sonli buyrug‘iga binoan Andijon muhandislik‑iqtisodiyot instituti negizida Andijon mashinasozlik instituti tashkil qilingan.

Andijon mashinasozlik instituti rektori vazifasida iqtisod fanlari doktori, professor Sotvoldiyev Abdulaziz Abdimo‘minovich, institut professori, tarix fanlari doktori Ulug‘bek Abdullayev, texnika fanlari doktori Ravshan Saydaxmedov, texnika fanlari nomzodi A.E.Teshaboev va Fizika matematika fanlari nomzodi, Ph.D. Doktor U.R.Salomovlar faoliyat ko‘rsatganlar.

2019 yil iyun oyidan buyon Andijon mashinasozlik instituti rektori vazifasida Turdialiyev Umid Muxtoraliyevich faoliyat olib bormoqda.

Andijon mashinasozlik institutida hozirgi kunda 5 ta fakultet mavjud bo‘lib, ular quyidagilar:

• Avtomatika va elektrotexnika fakulteti.
• Avtomobilsozlik fakulteti.
• Mashinasozlik texnologiyasi fakulteti.
• Transport va logistika fakulteti.
• Innovatsion taʼlim texnologiyalari fakulteti.

Bugungi kunga kelib, institutdagi mavjud “Mashinasozlik texnologiyasi”, “Avtomatika va elektrotexnika”, “Avtomobilsozlik”, “Transport va logistika” hamda “Innovatsion taʼlim texnologiyalari” fakultetlari negizida 16 ta bakalavriat taʼlim yo‘nalishlari va 5 ta magistratura mutaxassisliklari bo‘yicha kadrlar tayyorlanmoqda. O‘quv jarayonlari mavjud 18 ta kafedra asosida tashkil etilgan.