O‘zbekiston milliy universiteti

O‘zbekiston Milliy universiteti tarixi

Mirzo Ulug‘bek nomidagi O‘zbekiston Milliy universiteti (O‘zMU) — O‘zbekistondagi eng yirik oliy o‘quv yurti va ilmiy tekshirish markazlaridan biri hisoblanadi.

Tarixi bo‘yicha turli nomlar bilan atalgan va hozirda Mirzo Ulug‘bek nomidagi O‘zbekiston milliy universiteti deb ataladigan universitet 1918- yil 12- mayda Musulmon Xalq Dorulfununi nomi bilan ochilgan. 1918-1919- yillarda Turkiston xalq universitet, 1919-1923- yillarda Turkiston davlat universiteti, 1923-1960- yillarda O‘rta Osiyo davlat universiteti, 1960-2000- yillarda Toshkent davlat universiteti nomlari bilan yuritilib, faoliyat ko‘rsatgan. O‘zbekiston Respublikasi Vazirlar Mahkamasining 1995- yil 14- sentyabr sanasidagi qaroriga binoan universitetga Sharqning buyuk olimi, mutafakkiri Mirzo Ulug‘bek nomi berilgan.

O‘zbekiston Respublikasining birinchi prezidenti Islom Karimovning 2000 yil 28 yanvardagi farmoniga muvofiq, universitetga milliy universitet maqomi berildi va u hozirgi nomi bilan ataldi.

1200ga yaqin professor-o‘qituvchi faoliyat ko‘rsatadigan universitetda Biologiya, Ijtimoiy fanlar, Fizika, Geografiya-Geologiya, Iqtisodiyot, Jurnalistika, Kimyo, Matematika, Tarix, Xorijiy filologiya fakultetlari va 72 kafedra mavjud bo‘lib, 37 yo‘nalishda bakalavr, 63 yo‘nalishda magistratura taʼlimi berilmoqda.

Shu bilan birga universitetda Akademik litsey va kasb-hunar kollejlari bilan ishlash bo‘limi, Axborot xavfsizligi sohasida qayta tayyorlash va malaka oshirish markazi, Axborot texnologiyalari markazi, Axborot-resurs markazi, Bosh mexanik bo‘limi, Bosh energetik bo‘limi, Bosh-muhandis, Bosmaxona, Buxgalteriya, Devonxona, Ichki nazorat va monitoring bo‘limi va uch akademik litsey faoliyat ko‘rsatmoqda.

Universitetning “O‘zbekiston milliy universiteti” gazetasi, "O‘zMU xabarlari" ilmiy tadqiqot jurnali chop etilmoqda. Universitet kutubxonasida 3 milliondan ortiq kitob mavjud bo‘lib, kitob va jurnallar elektron shaklda tadqiqotchi va talabalarga taqdim qilinmoqda.