Xorijiy tillarga ixtisoslashtirilgan maktab-internatiga oʻquvchilarni qabul qilish tartibi loyihasi e’lon qilindi
Muhokamalar portaliga Ixtisoslashtirilgan ta’lim muassasalari agentligi tizimidagi Xorijiy tillarga ixtisoslashtirilgan maktab-internat faoliyatiga o‘quvchilarni saralab olish va qabul qilish tartibi to‘g‘risida nizom loyihasi joylashtirildi.
Unga ko‘ra kirish imtihoni har yili qabul komissiyasi tomonidan belgilangan muddatlarda o‘tkaziladi.
Maktabga tayyorlov guruhi hamda 1-sinflar uchun kirish imtihonlari ikki bosqichda quyidagicha o‘tkaziladi:
1-bosqich – mantiqiy fikrlash bo‘yicha maktabga tayyorlov guruhi uchun 10 ta, 1-sinf uchun 20 ta test shaklida o‘tkaziladi.
Birinchi bosqich natijasiga ko‘ra, qabul kvotasida belgilangan har bir o‘ringa 5 nafar hisobidan maksimal ball to‘plagan o‘quvchilarga ikkinchi bosqichda ishtirok etishga ruxsat etiladi.
2-bosqich – psixologik va intellektual qobiliyat darajasini aniqlash bo‘yicha turli darajadagi suhbatlar shaklida o‘tkaziladi.
Kirish imtihonlari:
a) 2–4-sinflar uchun bir bosqichda quyidagi fanlardan o‘tkaziladi:
-
2-sinf uchun matematika fanidan 15 ta, ingliz tili fanidan 10 ta test savollari shaklida;
-
3-sinf uchun matematika fanidan 20 ta, ingliz tili fanidan 10 ta test savollari shaklida;
-
4-sinf uchun matematika fanidan 20 ta, ingliz tili fanidan 15 ta test savollari shaklida.
b) 5–11-sinflar uchun bir bosqichda matematika fanidan 20 ta, ingliz tili fanidan 25 ta test savollari shaklida o‘tkaziladi.
— Ixtisoslashtirilgan maktabga o‘quvchilar yillik qabul kvotasi (ikkita sinfga bir xil 24 nafardan o‘quvchi taqsimlangan, 48 nafar o‘quvchidan iborat) doirasida qabul qilinadi.
— Ixtisoslashtirilgan maktabda 6 yoshli bolalar uchun 2 ta maktabga tayyorlov guruhi tashkil etiladi, ularga 10 nafardan 20 nafargacha bolalar qabul qilinishi mumkin.
— Ushbu muassasalarga qabul jarayonlari 2026/2027 o‘quv yilidan boshlab amalga oshirilishi rejalashtirilgan.
