Nogironligi bo‘lgan abituriyentlarga imtihonda 50 foiz qo‘shimcha vaqt beriladi
2027/2028-o‘quv yilidan boshlab nogironligi bo‘lgan abituriyentlar oliy ta’lim tashkilotlariga kirish imtihonlarida belgilangan vaqtning 50 foizi miqdorida qo‘shimcha vaqt olish imkoniyatiga ega bo‘ladi.
Yangi tartib Prezidentning 2026-yil 4-avgustdagi PQ–292-son qarorida belgilandi. Hujjat 5-avgustdan kuchga kirgan.
Qo‘shimcha vaqt qanday hisoblanadi?
Nogironligi bo‘lgan talabgor uchun imtihonga ajratilgan asosiy vaqtga uning yarmi miqdorida qo‘shimcha vaqt qo‘shiladi.
Masalan:
- imtihon 2 soat davom etsa — yana 1 soat;
- imtihon 3 soat davom etsa — yana 1,5 soat
qo‘shimcha vaqt beriladi.
Mazkur imkoniyat 2027/2028-o‘quv yilidan boshlab oliy ta’lim tashkilotlariga kirish imtihonlarida qo‘llanadi.
Moslashtirilgan imtihon materiallari taqdim etiladi
Qarorga muvofiq, nogironligi bo‘lgan talabgorlar uchun imtihon materiallaridan foydalanishning moslashtirilgan shakllari ham yaratiladi.
Jumladan, ularga:
- Brayl alifbosidagi materiallar;
- audio shakldagi topshiriqlar;
- elektron formatdagi imtihon materiallari
taqdim etilishi nazarda tutilgan.
Bu imkoniyatlar talabgorning ehtiyojidan kelib chiqib, imtihonda teng va qulay sharoit yaratishga xizmat qiladi.
Yangi tartib yana qaysi imtihonlarga tatbiq etiladi?
Qo‘shimcha vaqt va moslashtirilgan materiallardan foydalanish imkoniyati faqat OTMga kirish testlari bilan cheklanmaydi.
Tartib nogironligi bo‘lgan shaxslar ishtirok etadigan quyidagi sinovlarda ham qo‘llanadi:
- nogironligi bo‘lgan pedagog kadrlarni attestatsiyadan o‘tkazish;
- umumta’lim fanlarini bilish darajasini aniqlash;
- umumta’lim fanlaridan milliy sertifikat olish imtihonlari.
Demak, kirish, attestatsiya va milliy sertifikat imtihonlarida asosiy vaqtga nisbatan 50 foiz qo‘shimcha vaqt ajratiladi.
