Talabalar bahosi 30+20+50 tartibida shakllantirilishi mumkin

O‘zbekistonda 2026/2027-o‘quv yilidan boshlab bakalavriat va magistraturaga qabul qilinadigan talabalar bilimini baholashning yangi tartibini joriy etish rejalashtirilmoqda.

Bu haqdagi Vazirlar Mahkamasi qarori loyihasi jamoatchilik muhokamasiga qo‘yilgan. Hujjat hozircha yakuniy tasdiqlanmagan va undagi normalar muhokama natijasiga ko‘ra o‘zgarishi mumkin.

100 ball qanday taqsimlanadi?

Loyihada amaldagi 100 ballik baholash tizimini saqlab qolish taklif etilgan. Talabaning fan bo‘yicha umumiy natijasi quyidagicha shakllantiriladi:

• joriy nazorat — 30 ball;
• oraliq nazorat — 20 ball;
• yakuniy nazorat — 50 ball.

Tibbiyot yo‘nalishlarida baholash ballari ta’lim jarayonining o‘ziga xos xususiyatlarini hisobga olgan holda alohida tartibda taqsimlanishi nazarda tutilgan.

O‘qituvchi yozma izoh berishi kerak bo‘ladi

Yangi tartibda professor-o‘qituvchining faqat ball qo‘yishi yetarli bo‘lmasligi mumkin.

Loyihaga ko‘ra, o‘qituvchi har bir baholangan topshiriq yuzasidan talabaga kamida ikki-uch gapdan iborat izoh — fidbek yozishi kerak bo‘ladi. Izohda talabaning xatosi, natijasi va topshiriqni yaxshilash yo‘llari ko‘rsatilishi kutilmoqda.

Yakuniy imtihonlar videokuzatuv ostida o‘tkaziladi

Yakuniy nazoratlarni ovoz va videoni yozib oladigan kameralar o‘rnatilgan auditoriyalarda tashkil etish taklif qilinmoqda.

Imtihon va baholash jarayoniga oid videoyozuvlar kamida bir yil davomida saqlanishi rejalashtirilgan. Shuningdek, yakuniy imtihonlarni OTMning rasmiy veb-sayti orqali onlayn kuzatish imkoniyatini yaratish nazarda tutilmoqda.

Maxsus elektron platformalar yaratiladi

Qaror loyihasi tasdiqlansa, uch oy ichida:

• imtihonlarni onlayn kuzatish;
• kompyuterda test va yozma imtihon topshirish;
• baholash natijalarini elektron qayd etish

imkonini beradigan platformalar ishlab chiqilishi kerak bo‘ladi.

Bundan tashqari, har bir semestr yakunida talabalar o‘rtasida ta’lim va baholash sifati yuzasidan so‘rovnomalar o‘tkazish rejalashtirilgan.

Ko‘rish imkoniyati cheklangan talabalar uchun sharoit yaratiladi

Loyihada alohida ta’lim ehtiyojlariga ega talabalar uchun moslashtirilgan imtihon shakllarini joriy etish ham nazarda tutilgan.

Xususan, ko‘rish imkoniyati cheklangan talabalar uchun:

• Brayl alifbosidagi topshiriqlar;
• matnni ovozli o‘qish tizimi;
• assistent yordami

kabi imkoniyatlar yaratilishi mumkin.

Yangi tartib hozircha qaror loyihasi hisoblanadi. U yakuniy tasdiqlanganidan keyingina majburiy tartib sifatida kuchga kiradi.